धितोपत्र बोर्डका अध्यक्षसँग ‘क्लासमेट’को साइनो भेटिएपछि नबिलका डेपुटी सीइओ बजगाईंमाथिको अनुसन्धान रोकियो !

धितोपत्र बोर्डका उच्च अधिकारीले बजगाईंविरुद्धको कारवाही प्रक्रिया अगाडी नबढाउन अध्यक्ष श्रेष्ठले मौखिक निर्देशन दिएको बताए । ‘आदर्शजी र सन्तोष नारायणजी क्लासमेट हुनुहुँदो रहेछ । त्यसैले अनुसन्धान नगर्न भनिएको छ ।’ ती अधिकारीले भने, -‘उजुरीको विवरण गम्भीर नै थियो । कि अनुसन्धान गरेर सफाई दिनुपर्थ्यो, कि कारवाही गर्नुपर्थ्यो । तर अनुसन्धान नै नगर्ने भन्ने काम गलत भयो ।’

उजुरीमा बजगाईंले गैरकानुनी रुपमा सेयर कारोबार गरेको, नबिल बैंककै सब्सीडरी कम्पनीमा करोडौं उधारो राखेको र क्लाइण्टका गोप्य विवरणहरु सार्वजनिक गरेको लगायतका विवरण उल्लेख थिए । तर सो विवरणउपर अनुसन्धान भए बजगाईंलाई कारवाही गर्नुपर्ने देखेपछि बोर्ड अध्यक्ष स्वयमले सो अनुसन्धान रोकेको बोर्डका कर्मचारीहरुको दाबी छ ।

यता श्रेष्ठ र बजगाईं दुबैसँग धारणा लिन सम्पर्क गर्दा बजगाईंको फोन उठेन भने बोर्ड अध्यक्ष श्रेष्ठसँग सम्पर्क नै हुन सकेन ।

यद्यपी यो विषय अहिले बोर्डका कर्मचारीहरुले नै आन्तरिक रुपमा उठाएको पाइएको छ । बोर्ड अध्यक्ष श्रेष्ठ विरुद्ध आन्दोलनमा उत्रिएका कर्मचारीहरुले आफ्नो क्लासमेट भएकै कारण नबिल बैंकका डेपुटी सीइओ आदर्श बजगाईंले गरेको गैरकानुनी सेयर कारोबारको अनुसन्धान नगरेको र यस्तो प्रवृतिले बोर्डमाथि नै प्रश्न उठाएको भन्दै अध्यक्षको ध्यानाकर्षण गराएका थिए । यतिसम्मकि अनुसन्धान गर्नुपर्ने ठाउँमा उजुरीकर्ताको विवरण नै उल्टै बजगाईंलाई दिएको आरोपसमेत श्रेष्ठमाथि लागेको छ ।

बजगाईंले गरेको गलत कामको पर्दा उघार्ने धम्की दिएर नबिल इन्भेष्टमेन्ट बैंकिङका कर्मचारीले समेत गैरकानुनी सेयर कारोबार गरेको र दुवै पक्षको गलत कामको ढाकछोप भईरहेको आरोप स्वयम् नबिलकै कर्मचारीहरुको छ ।