काठमाडौँ। जापानमा बढ्दो ब्याजदरका कारण क्योटो फाइनान्सियल ग्रुपले निन्टेन्डो र क्योसेरालगायत कम्पनीमा रहेको आफ्नो सेयर बिक्री गरेर करिब ६ अर्ब डलरको सम्भावित नाफा उपयोग गर्ने सम्भावना बढेको छ।
कम्पनीका अध्यक्ष नोबुहिरो दोईका अनुसार सेयरमा लगानी कायम राख्नुभन्दा ती सेयर बिक्री गरेर प्राप्त रकम कर्जा प्रवाहमा लगाउँदा बढी आम्दानी गर्न सकिने अवस्था बनेको छ।
जापानका नियामक निकायहरूले कर्पोरेट सुशासन सुधार गर्न बैंक तथा कम्पनीहरूलाई एकअर्काको सेयरमा गरिने रणनीतिक लगानी अर्थात् क्रस-सेयरहोल्डिङ घटाउन आग्रह गर्दै आएका छन्।
क्योटो फाइनान्सियलले सन् २०२९ मार्चसम्म ३०० अर्ब येनभन्दा बढीको रणनीतिक सेयर लगानी घटाउने लक्ष्य राखेको छ। कम्पनीले अघिल्लो आर्थिक वर्षमा करिब १६० अर्ब येन बराबरको सेयर बिक्री गरेको थियो, जसमा निन्टेन्डोको केही सेयर पनि समावेश थियो।
ब्याजदर बढेसँगै बैंकको कर्जा कारोबारबाट हुने आम्दानीको सम्भावना बढेको छ। त्यसैले सेयर बिक्रीबाट प्राप्त रकम थप कर्जा प्रवाह गर्न वा अन्य कम्पनी अधिग्रहण गर्न प्रयोग गर्न सकिनेछ।
