काठमाडौं । ग्लोबल आईएमई बैंकका कर्मचारी पिताम्बर खड्काको मृत्यु प्रकरण सार्वजनिक भएपछि बैंकमा कार्यरत अन्य कर्मचारीहरुको परिवारसमेत गम्भीर चिन्तामा परेका छन् । विशेषगरी बैंकमा काम गर्ने छोराछोरीका बाआमाहरुले ‘ज्यान रहे जे पनि गर्न सकिन्छ’ भन्दै जागिर नै छाड्न सुझाव दिन थालेको खुलेको छ ।
बैंकभित्र बढ्दो मानसिक तनाव, अनावश्यक दबाब र व्यवस्थापनको व्यवहारबारे विभिन्न आरोप बाहिर आइरहेका बेला कर्मचारीका परिवारजनसमेत त्रसित बनेका हुन् । बैंकिङ संसारसँग कुरा गर्ने केही कर्मचारीहरुले अहिले घरबाट दैनिक रुपमा जागिर परिवर्तन गर्न दबाब आउन थालेको बताएका छन् ।
‘घरमा समाचार हेरेपछि आमाबुबा निकै डराउनुभएको छ । उहाँहरुले ‘त्यस्तो तनावमा बस्नुभन्दा जागिर छाड’ भन्न थाल्नुभएको छ ।’ एक कर्मचारीले बैंकिङ संसारसँग भने ।
विशेषगरी पिताम्बर खड्काले निधन अघि सामाजिक सञ्जालमा लेखेका भावनात्मक स्ट्याटस र केही अधिकारीहरुको तस्वीर राखेको विषयले धेरै अभिभावकलाई झस्काएको बैंकरहरुको भनाई छ ।
ग्लोबल आईएमई बैंक झापा घटना : पिताम्बर खड्काको अन्त्यष्टी, हेड अफिसबाट कोहि गएनन् मलामी !
केही कर्मचारीहरुले त पछिल्लो केही दिनदेखि घरमा आफूहरु रोइरहेको, निद्रा नलाग्ने, काममा जान डर लाग्ने अवस्था बनेको बताएका छन् ।
ग्लोबल आईएमई प्रकरण: सिइओसहित ४ हाकिम पक्राउ नपरेसम्म शब नबुझ्ने परिवारको अडान, नेपालमै छैनन् सिइओ !
मनोविद्हरुका अनुसार कार्यस्थलमा लगातारको मानसिक दबाब, असुरक्षाको भावना र अपमानजनक व्यवहारले व्यक्तिमा गम्भीर मानसिक असर पार्न सक्छ । यस्तो वातावरण लामो समय रहिरहे डिप्रेसन, आत्मविश्वासमा गिरावट तथा चरम अवस्थामा आत्मघाती सोचसमेत विकास हुन सक्ने उनीहरुको भनाइ छ । यता, ग्लोबल आईएमई बैंकले भने कर्मचारीहरुको गुनासोबारे सार्वजनिक रुपमा कुनै विस्तृत प्रतिक्रिया दिएको छैन ।
फलोअप: ग्लोबल आईएमई बैंक खड्का प्रकरण: सीइओसहित एचआर हेड अनामिकालाई पक्राउ गर्न स्थानीयको माग !
