समूहको नाममा रकम निकासा, बैंकको लगानी हिनामिना

सोमबार, ०९ पुष २०७५    Banking Sansar



समूहको नाममा रकम निकासा, बैंकको लगानी हिनामिना

बैतडी - विभिन्न समूह खडा गरी निकालिएको रकम हिनामिना भएको छ । बैंक तथा वित्तीय संस्थाले विभिन्न समुदायका व्यक्तिलाई समूह बनाई व्यवसाय गर्न चाहने सदस्यलाई ऋण दिने गर्छन् । तर, त्यस्ता समूहका सदस्यले अन्य सदस्यको नाममा समेत रकम झिकेर हिनामिना गरेपछि समूहका त्यस्ता सदस्यको घर खेत नै जाने भएको छ ।

तर बैतडीको दशरथचन्द नगरपालिका–२ देहिमाडौंमा एकै व्यक्तिले धेरैको नामबाट पैसा निकालेर हिनामिन गरेको पीडितले बताए । ६० वर्षीया गंगा बोहराले भनिन्, ‘मलाई रेवतीले समूहकी सदस्य बनाइन्, सदस्य बनेपछि कागजमा औंठाछाप गरेको तर त्यसबारेमा आफूलाई केही थाहा थिएन’ । तर, अहिले किस्ता तिर्ने बेलामा आफ्नो नामको पैसा आफंैतिर भन्ने गरेको गुनासो उनले गरिन् । रेवती बोहरा समूहको केन्द्र प्रमुख भएर काम गर्छिन् ।

रेवतीले धेरैको पैसा आफंैले चलाएको गुनासो आइरहँदा आफूले केही व्यक्तिको नामको पैसा ऋणमा चलाएको र त्यसको किस्ता आफैं तिरिरहेको बताइन् । उनले पछिल्ला केही किस्ता तिर्न बाँकी भए पनि पहिला भने नियमित किस्ता तिर्दै आएको जानकारी पनि दिइन् ।

अरूका नाममा निकालेको बढी रकम समूहका केन्द्र प्रमुख बोहरा र उपप्रमुख देवकी बोहराले चलाएको स्थानीयको आरोप छ । तर रेवतिले भने एक, दुई जना मात्रै नभई अरूले पनि अर्काको नामको पैसा चलाएको बताउँछिन् । उनले ऋण तिर्नसमेत व्यवसायबाट नभई अर्को वित्तीय संस्थाबाट ऋण नै निकाल्नुपर्ने बाध्यताका कारण समस्या आएको बताइन् ।

धेरै व्यक्तिको नामबाट निकालेको ऋण रकम समूहका टाठाबाठा एक, दुई जनाले आफ्नो काममा लगाएको देहिमाडौंका स्थानीय नैनसिंह बोहराले बताए । उनले भने, ‘म रोजगारीको सिलसिलामा भारतमा काम गर्दै आएको छु, अहिले घर आएको बेला थाहा पाएँ मेरो भाउजूले अरूका लागि ५÷६ लाख रुपैयाँ निकालिएको कुरा, त्यो कुरा जब मैले थाहा पाएँ मलाई निकै नराम्रो लाग्यो ।’

धेरै वित्तीय संस्थाबाट एकै व्यक्तिले आफ्नो नाममा ऋण निकालेकाले यस्तो समस्या आएको दशरथचन्द नगरपालिका–२ की वडा सदस्य गीता लावडले बताइन् । उनले भनिन् ‘हाम्रै छिमेकी पदम लावड, मोहन लावड, रामी लावड, जसु लावडलगायतका पाँच परिवारले घर छोडेरै भारत गइसकेका छन् । हरेक महिना किस्ता तिर्नुपर्नेहुन्छ किस्ता नतिरेमा समूहका मान्छे र वित्तीय संस्थाका मान्छे आएर घरमै ताला लगाइदिने, बेइज्जत गरिदिने भएका कारण उनीहरू भागेर गएका हुन् वडा सदस्य गीताले बताइन् ।

समूहका व्यक्तिको दस्तखतबिना नै पनि वित्तीय संस्थाले उनीहरूका नाममा ऋण दिने गरेको महिलाहरू बताउँछन् । स्थानीय गोमती बोहराका अनुसार वित्तीय संस्थामा नपुगेर मेरो नाममा ७५ हजार रुपयाँ ऋण निकालिएको छ तर ऋण निकाल्ने मान्छे छिमेकी भएकाले आफूले केही भन्न नसकेको उनको गुनासो छ ।

सो क्षेत्रमा सातवटा वित्तीय संस्थाहरूमध्ये ग्रामीण विकास लघुवित्त वित्तीय संस्था, किसान माइक्रोफाइनाइन्स, डिप्रोस लघुवित्त वित्तीय संस्था, निर्धन लघुवित्त वित्तीय संस्था, स्वदेशी लघुवित्त वित्तीय संस्था, लक्ष्मी लघुवित्त वित्तीय संस्था तथा नाडेफ लघुवित्त वित्तीय संस्थालगायतले समूहलाई लगानी गरेका छन् ।

वित्तीय संस्थाले कर्जा दिएको रकमको स्थानीयले सही सदुपयोग गर्न नसक्दा यो समस्या आएको ग्रामीण विकास वित्तीय संस्था बैतडीका प्रबन्धक भोजराज ओझाले बताए । उनले भने, ‘हाम्रो संस्थाबाट ऋण लिएका केही व्यक्तिहरूले तीन÷चार महिना यता किस्ता तिरेका छैनन्, उनीहरूले अन्यत्रबाट पनि ऋण लिएका रहेछन् भन्ने कुरा बल्ल थाहा भयो ।’

मंगलबार देहिमाडांैका स्थानीय बासिन्दाले समूहमा आबद्ध महिला र वित्तीय संस्थाका प्रतिनिधिलाई भेला गराइ छलफल गरेका छन् । भेलामा उपस्थित वित्तीय संस्थाका प्रतिनिधिप्रति नागरिकले आक्रोश पोखेका छन् ।

वित्तीय संस्थाका व्यक्तिले भने किस्ताको रकम कम गरी समय बढाएरसमेत ऋण रकम तिर्ने व्यवस्था गरिदिने बताएका छन् । स्वदेशी लघुवित्त वित्तीय संस्था पाटनका प्रबन्धक मोहनसिंह ऐरले भने, ‘ऋण लिने व्यक्तिको सजिलोका लागि समूहका व्यक्तिले सहमति गरेमा प्रतिमहिना कम किस्ता तिर्नुपर्ने र एक वर्षको ठाउँमा दुई वर्षको म्याद बनाइदिन सक्छौं ।’ राजधानी दैनिकबाट साभार


प्रतिकृया दिनुहोस