काठमाडौँ। बैंकिङ कसुर मुद्दामा फरार रहेका प्रतिवादी राममणी त्रिपाठी पक्राउ परेका छन्। चेक बाउन्स मुद्दामा ४१ वर्षका राममणी त्रिपाठी कलंकीबाट पक्राउ परेका हुन्।
कोपिला पौडेलको जाहेरीका आधारमा वादी नेपाल सरकार र प्रतिवादी राममणी त्रिपाठी भएको बैंकिङ कसुर मुद्दामा काठमाडौँ जिल्ला अदालतले २०८२ असार १० गते फैसला गर्दै जाहेरवालालाई विगोबापत रु. १४ लाख ६७ हजार ८ सय भराइदिने, प्रतिवादीलाई रु. ७३ हजार ३ सय ९० जरिबाना, ५ दिन कैद तथा पीडित राहत कोषमा क्षतिपूर्तिबापत रु. २ हजार ९ सय ३६ जम्मा गराउने आदेश दिएको थियो।
फैसलापछि फरार रहेका त्रिपाठीलाई फैसला कार्यान्वयनका क्रममा खटिएको प्रहरी टोलीले साउन २० गते बिहान करिब ७:३० बजे काठमाडौं महानगरपालिका १४, कलंकीबाट पक्राउ गरेको हो।
प्रहरीले पठाएको जानकारी अनुसार पक्राउ परेका प्रतिवादीलाई फैसला कार्यान्वयनका लागि काठमाडौँ जिल्ला अदालत, बबरमहलमा पेश गरिएको प्रहरीले जनाएको छ।
