काठमाडौँ। राष्ट्रिय वाणिज्य बैंकको ६१औँ वार्षिकोत्सव कार्यक्रम सम्पन्न भएको छ। शनिबार विशेष समारोहकाबीच बैंकको ६१औँ वार्षिकोत्सव सम्पन्न भएको हो ।
अर्थमन्त्री रामेश्वरप्रसाद खनालको प्रमुख आतिथ्यतामा सम्पन्न उक्त कार्यक्रममा बैंकको समग्र वित्तीय अवस्था, भावी रणनीति तथा बैंकिङ क्षेत्र सुधारका विविध विषयमा गहन छलफल गरिएको थियो।
समारोहलाई सम्बोधन गर्दै अर्थमन्त्री खनालले बैंकिङ क्षेत्रमा कर्जा विस्तार गर्दा ऋणीको मनोविज्ञान बुझ्नुपर्नेमा जोड दिए। उनले डिजिटल कारोबारलाई थप प्रोत्साहन गर्नुपर्ने, कर्जालाई परम्परागत धितोमा मात्र सीमित नराखी क्रेडिट स्कोर, उद्यमशीलता, आय-आर्जन क्षमता तथा ऋण तिर्न सक्ने सामर्थ्यका आधारमा विस्तार गर्नुपर्ने धारणा व्यक्त गरे।
यस अवसरमा बैंकका प्रमुख कार्यकारी अधिकृत देवेन्द्ररमण खनालले राष्ट्रिय वाणिज्य बैंकले उत्पादनशील क्षेत्रलाई प्राथमिकतामा राख्दै कर्जा प्रवाह गरिरहेको जानकारी दिए। उनका अनुसार बैंक प्रविधिमैत्री सेवाको विस्तार गर्दै डिजिटल बैंकिङलाई रणनीतिक प्राथमिकताका साथ अघि बढिरहेको छ।
हालै नेपाल क्लियरिङ हाउस लिमिटेडले आर्थिक वर्ष २०८०-८१ मा सबैभन्दा बढी क्यूआर मर्चेन्ट कारोबार तथा डिजिटल सरकारी कारोबार गर्ने बैंकका रूपमा राष्ट्रिय वाणिज्य बैंकलाई पुरस्कृत गरेको जानकारी पनि कार्यक्रममा दिइयो।
