काठमाडौँ। यसपालीको दशैँमा पनि नयाँ नोट साट्न नपाइने भएको छ। राष्ट्र बैंकले एक सूचना जारी गर्दै दशैँका लागि सुकिला नोट साट्न पाउने व्यवस्था गरेसँगै सर्वसाधारणहरूले यसपालीको दशैँमा पनि नयाँ नोट साट्न नमिल्ने भएको हो।
राष्ट्र बैंकका अनुसार यसपालि दशैँमा सर्वसाधारणले सुकिला नोट भने यही भदौ २९ गतेदेखि असोज १० गतेसम्म साट्न पाउनेछन्।
राष्ट्र बैंकको मुद्रा व्यवस्थापन विभागको थापाथलीस्थित कार्यालयसँगै प्रदेश कार्यालयहरु विराटनगर, जनकुपुर, वीरगन्ज, पोखरा, सिद्धार्थनगर, नेपालगन्ज र धनगढीबाट दशैँका लागि सुकिला नोट साट्न सकिन्छ।
अघिल्लो वर्षमा राष्ट्र बैंकले प्रतिव्यक्ति ५, १०, २०, ५० र १०० दरका १-१ बन्डल गरी १८ हजार पाँच सय रुपैयाँ सटहीको व्यवस्था गरेको थियो।
