काठमाडौँ । घरमा श्रीमती बिरामी हुँदा पनि असार मसान्त चलिरहेको भन्दै बिदा नदिएपछि बैंकका एक कर्मचारीले आफ्नै हाकिम कुटेका छन् ।
उनले असार ३० गते एक दिनका लागि बिदा मागेका थिए । तर, ३१ गते आउँछु भन्दाभन्दै पनि बिदा नदिएपछि ती कर्मचारीले हाकिम कुटेका हुन् ।
अहिले यस विषयमा सम्बन्धित बैंकको एचआर विभागले आन्तरिक अनुसन्धान गरिरहेको छ ।
यसअघि ऋणी र ब्रान्च मेनेजर बीच यस्तै हात हालाहाल भएको घटनासमेत बाहिरिएको थियो । लम्कीमा रहेको ग्लोबल आईएमई बैंकका मेनेजरलाई एक ऋणीले हातपात गरेपछि बैंकर्स क्लबले आपत्ति जनाएको थियो । पछि दुई पक्षबीच मिलापत्र भएको थियो । बैंकभित्र हुने यस्ता घटनालाई बैंकरहरुले गम्भीर रुपमा हेर्ने गरेका छन् ।
*अपडेट:
समाचार प्रकाशन भएपछि कतिपय बैंकरले घटनाको विवरण खुलाउन आग्रह गरेका छन् । कतिपयले घटनाबारे विस्तृत विवरण थाहा पाउने हुटहुटीले त कतिपयले यो घटनाको पात्र सार्वजनिक हुनुपर्ने उद्देश्य राखेर त्यस्तो आग्रह गरिरहेका छन् । तर कुटाई खाने र कुट्ने दुवै पक्षले अहिले बैंकले समेत अनुसन्धान गरिरहेकाले आफ्नो परिचय बाहिर नल्याईदिन तारान्तर आग्रह गरिरहेका छन् । अझ, कुटाई खाने पक्षले त आफ्नो बैंक र आफ्नो विवरण सार्वजनिक भए दुर्गा प्रसाईंका कार्यकर्ताबाटसमेत डर हुने हुनाले आफ्नो र बैंकको परिचय गोप्य राखिदिन आग्रह गरेका छन् । उनले यहि डरले समेत आफु हातपात गर्ने पक्षसँग मिल्न तयार भईसकेको र बैंकको निर्णय मान्ने बताईरहेका छन् ।
उनले परिचय खुलाउनुपर्ने मागसहित मिडियामा फोन गर्नेहरु दुर्गा प्रसाईंकै कार्यकर्ता भएको हुनसक्ने र आफुलाई खोजी गरिरहेको हुनसक्नेतर्फसमेत चिन्ता व्यक्त गरेका छन् । उनले आफ्नो परिचय खुलाउन लगाएर केहि साथीहरुले बेइज्जत गर्न खोजेको आरोपसमेत लगाएका छन् । ‘घटनाको विवरण खुलाउन माग गर्दै कतिपय साथीहरुले तपाईंहरुलाई फोन गरिरहेको पनि थाहा पाएको छु । यो मेरो बदनाम गर्ने षड्यन्त्र हो । कार्यालयको सामान्य झगडा समाचारको विषय नबनेको भए राम्रो हुन्थ्यो, अव बनिहाल्यो, यसको च्याप्टर क्लोज गरिदिए आभारी हुनेथिएँ ।’ घटनाका पात्र ती बैंकरले भने ।
(घटनाको विवरण सार्वजनिक हुँदा कुटाई खाने वा सम्बन्धित पक्षलाई पर्ने असर वा विवरण सार्वजनिक नगर्दा कसलाई के असर पर्न सक्छ भन्ने विषयमा हामी सम्पादकीय छलफल र कानुनी परामर्शमै छौं । सम्बन्धित बैंकले यसको आन्तरिक अनुसन्धान गरिरहेकोले पनि घटनासँग सम्बन्धित पात्रको परिचय गोप्य राखिएको छ । अनुसन्धान सकिएपछिको विवरण प्रकाशन गरिनेछ । – सम्पादक)
