काठमाडौँ । मोबाइल बैंकिङ, वालेट तथा कनेक्ट आईपीएसबाट ५०० रुपैयाँसम्मको रकम ट्रान्सफर गर्दा कुनै पनि शुल्क नलाग्ने भएको छ । नेपाल क्लियरिङ हाउस (एनसीएचएल) ले शुल्क परिमार्जन गर्दै यस्तो व्यवस्था लागु गरेको हो ।
एनसीएचएलले बुधबार एक सूचना जारी गर्दै अबदेखि मोबाइल बैंकिङ, वालेट तथा कनेक्ट आईपीएसबाट ५०० रुपैयाँसम्मको रकम ट्रान्सफरमा कुनै पनि शुल्क नलाग्ने जनाएको छ।
एनसीएचएलका अनुसार रिटेल पेमेन्ट स्विच (आरपीएस) प्रणालीमा लाग्ने शुल्क परिमार्जन गर्दै कारोबार रकम सीमाको आधारमा लागु हुन्छ । मोबाइल बैंकिङ, कनेक्ट आईपीएसको मोबाइल एप तथा वेबसाइट र वालेटमा रकम राख्दा र झिक्दा ५०० रुपैयाँसम्मको रकम ट्रान्सफरमा कुनै पनि शुल्क लाग्ने छैन ।
तर, उक्त माध्यमबाट पाँच सय रुपैयाँदेखि पाँच हजार रुपैयाँसम्म ट्रान्सफर गर्दा ४ रुपैयाँ र पाँच हजारमाथिको हकमा ८ रुपैयाँ शुल्क लाग्नेछ । यता मर्चेन्ट भुक्तानीको हकमा पाँच सय रुपैयाँसम्म २ रुपैयाँ, पाँच सयदेखि पाँच हजारसम्मको भुक्तानीमा ४ रुपैयाँ र पाँच हजारभन्दा माथिको भुक्तानीमा ८ रुपैयाँ शुल्क तोकिएको छ ।
