काठमाडौं। बैंक तथा वित्तीय संस्थाहरूबाट कर्जा लिएर नतिर्ने ८९ हजार ऋणीहरू खराब सुचीमा परेका छन् । चेक बाउन्सरमा परेर पनि पैसा नतिर्ने ८९ हजार ऋणीहरूको खाता ब्लक रहेको पाइएको हो ।
चालु आर्थिक वर्ष ०८०-८१ को वैशाखमा मात्रै ४० हजार ग्राहकको खाता बन्द भएका कर्जा सूचना केन्द्रले जनाएको छ ।
बैंक खाता बन्द हुनेमा ०४७ साल यता बैंक तथा वित्तीय संस्थाहरूमा कर्जा लिएर नतिर्ने ऋणी र चेक बाउन्सरमा परेर पनि पैसा नतिर्ने ऋणीहरूका खाता रहेका छन् । कर्जा सूचना केन्द्रका अनुसार जेठ २४ गतेसम्म ८९ हजार ग्राहकका खाता चेक बाउन्स र ऋण नतिरेका कारण ‘ब्लक’ भएका हुन् ।
बैंक तथा वित्तीय संस्थाबाट कर्जा लिएर नतिरेका तथा बैंकको सम्पर्कमा नआएका ऋणीहरू यसरी खराब सूचीमा पर्ने गर्दछन् । ऋण नउठेपछि बैंकहरूले धितो लिलामी गर्नु अगाडि उनीहरूलाई खराब सूचीमा राखेर धितो असुल नगरुन्जेल वित्तीय सेवाबाट वञ्चित गराउँछन् ।
