काठमाडौँ। विश्व बैंकले चालु आर्थिक वर्षका लागि भारतको आर्थिक वृद्धिदरको अनुमान ६.३ प्रतिशतबाट बढाएर ६.६ प्रतिशत पुर्याएको छ। बलियो आन्तरिक माग र पछिल्ला स्वतन्त्र व्यापार सम्झौताका कारण भारतको आर्थिक वृद्धिदर अपेक्षाभन्दा बलियो रहने विश्व बैंकले अनुमान गरेको हो।
विश्व बैंकका अनुसार भारत दक्षिण एसियाको आर्थिक वृद्धिको प्रमुख इन्जिनका रूपमा कायमै रहनेछ। भारतको आर्थिक वृद्धि आर्थिक वर्ष २०२५ मा ७.१ प्रतिशत रहेकोमा आर्थिक वर्ष २०२६ मा ७.६ प्रतिशत पुग्ने अनुमान गरिएको छ। यसको मुख्य कारण बलियो आन्तरिक माग र निर्यातमा देखिएको लचकता रहेको विश्व बैंकले जनाएको छ।
विशेषगरी निजी उपभोगमा उल्लेख्य वृद्धि भएको छ। कम मुद्रास्फीति तथा वस्तु तथा सेवा कर (जीएसटी) दरको पुनर्संरचनाले उपभोक्ताको खर्च गर्ने क्षमता बढाउन सहयोग गरेको विश्व बैंकको प्रतिवेदनमा उल्लेख छ।
यद्यपि, जीएसटी दरमा गरिएको कटौतीले आर्थिक वर्ष २०२७ को पहिलो अर्धवार्षिकमा उपभोक्ता मागलाई निरन्तर समर्थन गर्ने अपेक्षा गरिएको छ। विश्वव्यापी ऊर्जा मूल्य भने उच्च रहँदा त्यसले मुद्रास्फीतिमा दबाब बढाउने र घरपरिवारको खर्चयोग्य आम्दानीमा असर पार्ने जोखिम रहेको विश्व बैंकले जनाएको छ।
विश्व बैंक समूहले सार्वजनिक गरेको अर्धवार्षिक क्षेत्रीय आर्थिक परिदृश्य प्रतिवेदनमा दक्षिण एसियाको आर्थिक वृद्धिको प्रमुख आधार भारतको बलियो प्रदर्शन रहेको उल्लेख गरिएको छ। बलियो घरेलु मागसँगै भन्सार दरमा कटौती तथा बेलायत र युरोपेली संघसँग भएका पछिल्ला स्वतन्त्र व्यापार सम्झौताले भारतको आर्थिक वृद्धिलाई थप टेवा पुर्याउने अपेक्षा गरिएको छ।
विश्व बैंकका दक्षिण एसियाका उपाध्यक्ष जोहानेस जुटले चुनौतीपूर्ण विश्वव्यापी आर्थिक वातावरणका बाबजुद दक्षिण एसियाको आर्थिक वृद्धिको सम्भावना बलियो रहेको बताएका छन्।
