काठमाडौँ । वाणिज्य बैंकहरूको आधार दर (बेस रेट ) घटेको छ । पछिल्लो केही महिनायता निक्षेपको ब्याजदर निरन्तर घट्दै गएका कारण बैंकहरूको आधार दर पनि घट्दै गएको हो ।
वाणिज्य बैंकहरूको आधार दर ५ प्रतिशतमा झरेको छ । साथै, कर्जाको माग अपेक्षित रुपमा बढ्न नसकेका कारण बैंकहरुले ०.१० प्रतिशतदेखि ५ प्रतिशतसम्म प्रिमियम जोडेर कर्जा दिँदै आइरहेका छन् ।
हाल स्ट्याण्डर्ड चार्टर्ड बैंक, एभरेष्ट बैंक र राष्ट्रिय वाणिज्य बैंकको आधार दर साढे ५ प्रतिशतभन्दा तल आएको छ ।
स्ट्याण्डर्ड चार्टर्डको आधार दर ५.०३ प्रतिशत, राष्ट्रिय वाणिज्य बैंकको ५.२८ प्रतिशत र एभरेष्ट बैंकको ५.४६ प्रतिशतमा झरेको छ।
बैंकहरुको आधार दर घट्नु भनेको ऋणको ब्याजदर सस्तो हुनु हो। बैंकहरुले बेस रेटमा अधिकतम ५ प्रतिशतसम्म प्रिमियम थपेर कर्जा दिने गरेका छन्।
