काठमाडौँ । नबिल बैंक र मुक्तिनाथ कृषि कम्पनीले कृषि प्रवर्द्धनका लागि एक समझदारी गरेका छन् । बैंक र कृषि कम्पनीले कृषि प्रबर्द्धन, अनुसन्धान, विकास, पूर्वाधार निर्माण, यान्त्रिकीकरण लगायत किसानहरूमा उद्यमशीलता विकासका लागि समझदारी गरेका हुन् ।
नबिल बैंकका प्रमुख कार्यकारी अधिकृत (सीईओ) ज्ञानेन्द्रप्रसाद ढुंगानाको उपस्थितिमा बैंकका वरिष्ठ नायब प्रमुख कार्यकारी अधिकृत सुजित कुमार शाक्य र मुक्तिनाथ कृषि कम्पनीका प्रबन्ध निर्देशक भरतराज ढकालले उक्त सम्झौता पत्रमा हस्ताक्षर गरेका हुन् ।
ग्राहकहरूको आवश्यक वित्तीय र गैरवित्तीय सेवाहरूमा पहुँच विस्तार गर्ने मुख्य उद्देश्य राखेर समझदारी गरिएको छ । बैंकले हरित वित्तपोषण र कृषि सम्बन्धी परियोजना विकास तथा कार्यान्वयनमा यो समझदारी महत्त्वपूर्ण हुने जनाएको छ ।
यस सम्झौता अनुसार, नबिल बैंकले कृषि लगानीका लागि बजार विस्तार तथा क्षमता अभिवृद्धि गर्ने भएको छ भने मुक्तिनाथ कृषि कम्पनीले तालिम तथा विकास, सल्लाहकार सेवा, ग्राहक र कर्मचारीलाई खाद्य साक्षरता अभिवृद्धि गर्न सहयोग गर्ने सम्झौतामा उल्लेख छ ।
