काठमाडौँ। नेपाल इन्भेस्टमेन्ट मेगा बैंकले वित्तीय विवरण सार्वजनिक गरेको छ। बैंकले चालु आर्थिक वर्ष २०८२-८३ को पहिलो ६ महिनाको वित्तीय विवरण सार्वजनिक गरेको हो।
बैंकले चालु आर्थिक वर्षको पहिलो ६ महिनासम्म १ अर्ब ६१ करोड ३० लाख रुपैयाँ नाफा आर्जन गरेको छ। अघिल्लो आर्थिक वर्ष २०८१-८२ को सोही अवधिसम्म बैंकले २ अर्ब ८३ करोड २३ लाख रुपैयाँ नाफा आर्जन गरेको थियो। बैंकको नाफा अघिल्लो वर्षको तुलनामा ४३.०५ प्रतिशतले घटेको छ। समीक्षा वर्षसम्म बैंकको वितरणयोग्य मुनाफा ३ अर्ब ६२ करोड १० लाख रुपैयाँले ऋणात्मक रहेको छ। अघिल्लो वर्ष पनि यही अवधिसम्म बैंकको वितरणयोग्य मुनाफा २ अर्ब ८६ करोड ३५ लाख रुपैयाँले ऋणात्मक थियो।
बैंकको सञ्चालन मुनाफा २ अर्ब ४० करोड २१ रुपैयाँमा भएको छ। अघिल्लो वर्ष सञ्चालन मुनाफा ४ अर्ब ४ करोड ३३ लाख रुपैयाँमा सीमित थियो। बैंकको सञ्चालन मुनाफा ४०.५९ प्रतिशतले कम हो। दोस्रो त्रैमाससम्म बैंकले ६ अर्ब ६२ करोड ३ लाख रुपैयाँ ब्याज आम्दानी गरेको छ। अघिल्लो वर्ष यही अवधिसम्म बैंकले ७ अर्ब ३६ करोड ५१ लाख रुपैयाँ ब्याज आम्दानी गरेको थियो। बैंकको ब्याज आम्दानी १२.८३ प्रतिशतले घटेको छ।
त्यस्तै, चुक्तापुँजी ३४ अर्ब १२ करोड ८५ लाख रुपैयाँ रहेको बैंकको रेटिन्ड अर्निङ ३ अर्ब ६२ करोड १० लाख रुपैयाँ ऋणात्मक रहेको छ भने रिजर्भमा ३५ अर्ब ९६ करोड ३१ लाख रुपैयाँ रहेको छ। अघिल्लो वर्ष असार मसान्तसम्म रिटेन्ड अर्निङमा २ अर्ब ४५ करोड ५१ लाख रुपैयाँले ऋणात्मक थियो भने रिजर्भमा ३३ अर्ब ३० करोड ८५ लाख रुपैयाँ थियो। समीक्षा वर्षसम्म बैंकले ५ खर्ब १९ अर्ब १० करोड रुपैयाँ निक्षेप संकलन गरी ३ खर्ब २८ अर्ब १६ करोड रुपैयाँ कर्जा लगानी गरेको छ। अघिल्लो वर्ष असार मसान्तसम्म बैंकले ४ अर्ब ७२ अर्ब ३४ करोड रुपैयाँ निक्षेप संकलन गरी ३ खर्ब २३ अर्ब १७ करोड रुपैयाँ कर्जा लगानी गरेको थियो।
यता समीक्षा अवधिसम्म बैंकको खराब कर्जा अनुपात (एनपीएल) बढेर ७.९० प्रतिशतमा पुगेको छ भने बैंकको वार्षिकीकृत प्रतिसेयर आम्दानी (ईपीएस) घटेर ९.४५ रुपैयाँ कायम भएको छ। पीई रेसियो २०.२० गुणा रहेको बैंकको प्रतिसेयर नेटवर्थ १९४.७७ रुपैयाँ रहेको बैंकले सार्वजनिक गरेको वित्तीय विवरणले देखाएको छ।
