काठमाडौँ। वाणिज्य बैंकहरूले १ खर्ब बढी सेयर लोन प्रवाह गरेका छन्। नेपाल राष्ट्र बैंकले सार्वजनिक गरेको चालु आर्थिक वर्ष २०८२-८३ को १० महिनासम्मको तथ्यांकअनुसार २० वटा वाणिज्य बैंकमध्ये १९ वटाले १ खर्ब ३९ अर्ब ६२ करोड ५३ लाख रुपैयाँ सेयर लोन प्रवाह गरेका हुन्।
बैंकहरुले गत आर्थिक वर्ष २०८१-८२ को वैशाखसम्म १ खर्ब ३ अर्ब १३ करोड ७७ लाख रुपैयाँ सेयर लोन दिएका थिए। यो हिसाबले समीक्षा अवधिमा बैंकहरुले प्रवाह गरेको सेयर लोन अघिल्लो वर्षको तुलनामा ३५.३८ प्रतिशतले बढेको छ।
चालु आर्थिक वर्षको वैशाखसम्म नबिल बैंकले १७ अर्ब ६८ करोड ६२ लाख रुपैयाँ सेयर लोन प्रवाह गरेको छ। जुन अघिल्लो वर्षको वैशाखसम्मको तुलनामा २१.१९ प्रतिशतले बढी हो। अघिल्लो वर्ष वैशाखसम्ममा बैंकले १४ अर्ब ५९ करोड ३५ लाख रुपैयाँ सेयर लोन दिएको थियो।
दोस्रो धेरै सेयर लोन प्रवाह गर्नेमा ग्लोबल आइएमई बैंक रहेको छ। अघिल्लो वर्ष वैशाखसम्म ११ अर्ब ५९ करोड १४ लाख रुपैयाँ सेयर लोन दिएको बैंकले समीक्षा अवधिसम्म २४.७८ प्रतिशतले बढाएर १४ अर्ब ४६ करोड ३६ लाख रुपैयाँ पुर्याएको छ।
