काठमाडौं । डिजिटल पत्रकारितामा नयाँ अभ्यास गर्दै विचारधारा डटकम (bichardhara.com) ले प्रधानमन्त्री बालेन शाहको १०० दिने कार्ययोजना तथा सरकारले अघि बढाएको भ्रष्टाचारविरुद्धको अभियानको निगरानी गर्न विशेष वेब एप सार्वजनिक गरेको छ।
उक्त एपमार्फत सरकारको कार्यप्रगति, लक्ष्यको कार्यान्वयन अवस्था तथा कानुनी कारबाहीमा परेका व्यक्तिहरूको विवरणलाई तथ्याङ्कमा आधारित रूपमा हेर्न सकिने व्यवस्था गरिएको छ।
एपका अनुसार, प्रधानमन्त्रीले पदभार ग्रहण गरेपछि सार्वजनिक गरेका १०० दिने लक्ष्यहरू कुन चरणमा छन् र कति प्रतिशत कार्य सम्पन्न भएको छ भन्ने जानकारी सहज रूपमा उपलब्ध हुनेछ। साथै, भ्रष्टाचारसम्बन्धी विभिन्न चर्चित प्रकरणमा संलग्न व्यक्तिहरूको अवस्था-जेलमा रहेको, धरौटीमा छुटेको वा फरार रहेको-समेत समेटिएको छ।
यस प्रविधिले सरकारी प्रतिबद्धता र वास्तविक उपलब्धिबीचको अन्तरलाई स्पष्ट पार्दै पारदर्शिता र जवाफदेहितामा टेवा पुर्याउने अपेक्षा गरिएको छ। सर्वसाधारणले पनि मोबाइल वा कम्प्युटरमार्फत कुनै पनि समयमा सरकारको ‘रिपोर्ट कार्ड’ हेर्न सक्नेछन्।
विचारधारा डटकमका अनुसार, यो एपले भ्रामक सूचनाको सट्टा आधिकारिक र अद्यावधिक तथ्याङ्कलाई प्राथमिकता दिँदै नागरिकलाई तथ्यमा आधारित जानकारी प्रदान गर्ने लक्ष्य राखेको छ। यो पहलले नेपाली मिडिया क्षेत्रमा डिजिटल पत्रकारिताको नयाँ मानक स्थापना गर्ने, सुशासनका लागि दबाब सिर्जना गर्ने तथा भ्रष्टाचारविरुद्ध समाजमा ऐक्यबद्धता बढाउने विश्वास गरिएको छ।
