काठमाडौँ। बैंकहरुको मुद्दति निक्षेपमा बीमा कम्पनीहरुको लगानी ३ प्रतिशत बढीले बढेको पाइएको छ । नेपाल राष्ट्र बैंकले सार्वजनिक गरेको चालु आर्थिक वर्ष २०८२-८३ को ८ महिना फागुनसम्मको तथ्यांकले पछिल्लो एक वर्षको अवधिमा बैंकहरुको मुद्दति निक्षेपमा बीमा कम्पनीहरुको लगानी ३ प्रतिशत बढीले बढेको देखाएको हो ।
फागुनसम्म बैंकहरुको मुद्दति निक्षेपमा बीमा कम्पनीहरुले ६ खर्ब ६६ अर्ब २३ करोड रुपैयाँ लगानी गरेका छन्। अघिल्लो आर्थिक वर्ष २०८१-८२ को फागुनसम्म बीमा कम्पनीहरुले बैंकहरुको मुद्दति निक्षेपमा ६ खर्ब ४४ अर्ब ४१ करोड रुपैयाँ लगानी गरेका थिए। अघिल्लो वर्षको तुलना समीक्षा अवधिसम्म बीमकको लगानी ३.३७ प्रतिशतले बढेको हो।
चालु आर्थिक वर्षको फागुनसम्ममा कर्मचारी सञ्चय कोषले बैंकहरुको मुद्दति निक्षेपमा १ खर्ब ८१ अर्ब ३६ करोड रुपैयाँ लगानी गरेका छन्। अघिल्लो वर्षको सोही अवधिसम्म कोषले १ खर्ब ७७ अर्ब ३ करोड ९४ लाख रुपैयाँ लगानी गरेको थियो। अघिल्लो वर्षको तुलनामा समीक्षा अवधिमा कोषको लगानी २.४५ प्रतिशतले बढेको छ।
समीक्षा अवधिसम्म बैंकहरुमा सर्वसाधारणको ४९ खर्ब ७० अर्ब ७ करोड रुपैयाँ निक्षेप रहेको छ। अघिल्लो वर्ष यही अवधिसम्म बैंकहरुमा सर्वसाधारणको ४२ खर्ब ६२ अर्ब १७ करोड रुपैयाँ निक्षेप रहेको थियो। सर्वसाधारणको निक्षेप १६.६१ प्रतिशतले बढेको छ।
