काठमाडौँ । बंगलादेशको केन्द्रीय बैंकले ब्याजदर बढाउने भएको छ । बंगलादेशको केन्द्रीय बैंकका प्रमुख डा. अहसान एच मन्सुरले मुद्रास्फीति नियन्त्रण गर्न आगामी महिनाहरूमा १० प्रतिशत वा सो भन्दा बढी ब्याज बढाउने जनाएका हुन् ।
भारतीय सञ्चार बिबिसीको अन्तरवार्तामा बोल्दै उनले बंगलादेशले विश्व बैंकसँग थप १.५ अर्ब डलर, एसियाली विकास बैंक र जापान अन्तर्राष्ट्रिय सहयोग नियोगबाट १-१ अर्ब डलर माग गरिरहेको उल्लेख गरेका छन् ।
साथै, उनले देशको बैंकिङ क्षेत्रलाई सफा गर्नु आफ्नो उच्च प्राथमिकता भएको कुरामा जोड दिएका छन् । बढ्दो मूल्य बङ्गलादेशका लागि प्रमुख चिन्ताको विषय बनेको उनी बताउँछन् ।
आईएमएफमा तीन दशक बिताएका अनुभवी अर्थशास्त्री डा.मन्सुरलाई नोबेल पुरस्कार विजेता मुहम्मद युनुसको नेतृत्वमा रहेको अन्तरिम सरकारले गत हप्ता बङ्गलादेश बैंकको गभर्नरमा नियुक्त गरेको थियो।
