काठमाडौँ। आज मौद्रिक नीति सार्वजनिक हुने भएको छ। नेपाल राष्ट्र बैंकका गभर्नर डा. विश्वनाथ पौडेलले आफ्नो कार्यकालको दोस्रो मौद्रिक नीति सार्वजनिक गर्ने तयारी गरेका हुन्। नेपाल राष्ट्र बैंकले आर्थिक वर्ष २०८२-८३ को मौद्रिक नीतिको वार्षिक समीक्षा प्रतिवेदन सार्वजनिक गरेको छ ।
व्यवस्थापन समितिको बैठक सम्पन्न भएपछि सञ्चालक समितिको बैठक बस्ने सम्भावना रहेको बुझिएको छ।
बैंकिङ प्रणालीमा थुप्रिएको १४ खर्ब रुपैयाँभन्दा बढी लगानीयोग्य पुँजी परिचालन गर्दै सरकारले लिएको ७ प्रतिशत आर्थिक वृद्धिको लक्ष्यलाई सहयोग गर्ने गरी नेपाल राष्ट्र बैंकले यस वर्ष लचिलो मौद्रिक नीति ल्याउने भएको छ ।
राष्ट्र बैंक स्रोतका अनुसार आगामी आर्थिक वर्ष २०८-८४ को मौद्रिक नीतिको मस्यौदा अन्तिम चरणमा पुगेको छ । व्यवस्थापन समितिले नीतिका मुख्य विषय टुंग्याइसकेको छ भने सञ्चालक समितिबाट स्वीकृत भएपछि आज साँझ वा भोलि बिहान सार्वजनिक गर्ने तयारी गरिएको छ ।
यस पटकको मौद्रिक नीतिमा बैंक तथा वित्तीय संस्थासम्बन्धी नियामकीय व्यवस्था समावेश नगरिने भएको छ । त्यस्ता व्यवस्था आवश्यकताअनुसार राष्ट्र बैंकले छुट्टै निर्देशनमार्फत संशोधन गर्ने भएकाले मौद्रिक नीतिमा मौद्रिक उपकरण तथा समष्टिगत आर्थिक व्यवस्थापनसँग सम्बन्धित विषयलाई मात्र प्राथमिकता दिइने स्रोतले जनाएको छ ।
हाल बैंक तथा वित्तीय संस्थाहरूमा १४ खर्ब रुपैयाँभन्दा बढी लगानीयोग्य रकम भए पनि निजी क्षेत्रबाट कर्जाको माग अपेक्षित रूपमा बढ्न सकेको छैन । ब्याजदर ऐतिहासिक रूपमा न्यून तहमा झरे पनि कर्जा विस्तार सुस्त रहेकाले अर्थतन्त्रमा अपेक्षित चलायमानता आउन सकेको छैन ।
यही अवस्थालाई मध्यनजर गर्दै राष्ट्र बैंकले कर्जा प्रवाहलाई प्रोत्साहन गर्ने र निजी क्षेत्रको लगानी विस्तारलाई सहज बनाउने उद्देश्यसहित लचिलो मौद्रिक नीति ल्याउने तयारी गरेको हो । यसले उत्पादन, उद्योग, व्यापार र पूर्वाधार क्षेत्रमा लगानी बढाएर आर्थिक गतिविधि चलायमान बनाउने अपेक्षा गरिएको छ ।
Monetary-Policy-2082-83-Annual-Review-1
