काठमाडौँ । सप्तरीमा एक बैंकका सुरक्षा गार्डको हत्या भएको छ । बिहीबार बिहान सप्तकोशी नगरपालिका-१ फत्तेपुरस्थित नेपाल बैंक लिमिटेडका सुरक्षा गार्डको हत्या भएको हो ।
बिहीबार बिहान ३ बजेर १८ मिनेटमा घाँटीमा खुकुरी प्रहार गरी हत्या गरेको सीसीटीभी फुटेजमा देखिएको सप्तरीका प्रहरी प्रवक्ता डीएसपी ढुण्डीराज न्यौपानेले जानकारी गराएका छन् ।
गार्डको कोठा अबेरसम्म नखुलेपछि बैंकका कर्मचारीहरुले ढोका खोलेर हेर्दा उनी सुतेकै ठाउँमा मृत फेला परेका थिए ।
न्यौपानेका अनुसार गार्डमाथि खुकुरी प्रहार गरी हत्या गरेर बैंकमा लुटपाटको प्रयास गरेको देखिएको छ ।
विगत ८ वर्षदेखि बैंकमा गार्ड रहेका सप्तकोशी नगरपालिका- २ बस्ने मृतक फुयाँलका श्रीमती २ छोरा र २ छोरी छन् । उनी नेपाली सेनाबाट सेवा निवृत्त भएपछि गार्डको रुपमा काम गर्न थालेका थिए ।
