बीमांकी रोस्टर बनाउँदै बीमा समिति

आइतबार, २७ माघ २०७५    Banking Sansar



बीमांकी रोस्टर बनाउँदै बीमा समिति

काठमाडौं - बीमा समितिले बिमांकी रोस्टर निर्माण गर्ने भएको छ । नेपाली बिमा कम्पनी र बिमांकीबीच सहजीकरण गर्न समितिले रोस्टर बनाउने भएको हो । समितिले ४५ दिने सूचना जारी गरी इच्छुक बिमांकीलाई आवेदनको लागि आह्वान गरेको छ । विश्वका कुनै पनि मुलुकका बिमांकीले आवेदन दिन सक्नेछन् । 

जीवन बिमा कम्पनीहरूले प्रत्येक वर्ष बिमांकीय मूल्यांकन गर्नुपर्छ, जसका लागि बिमांकी नै चाहिन्छ । तर, नेपालमा भने एकजना पनि बिमांकी छैनन् । नेपालका कम्पनीहरूले भारतीय बिमांकी प्रयोग गर्दै आएका छन् । 

आवेदनका लागि बिमांकी अध्ययन गरी बिमांकी सोसाइटीबाट लाइसेन्स प्राप्त गरेको हुनुपर्नेछ । अन्तर्राष्ट्रिय बिमांकीले प्रत्यक्ष रूपमा समितिसँग आबद्ध हुन पाउनेछन् । समितिले छनोट गरेका बिमांकीसँग बिमा कम्पनीहरूले काम गर्न सक्नेछन् ।
 
कम्पनीलाई बिमांकी पाउन कठिन

नयाँ जीवन बिमा कम्पनीहरूलाई विश्वसनीय बिमांकी पाउन कठिन हुने गरेको बिमा समितिका निर्देशक कमल रेग्मीले बताए । अनुभवी बिमांकीहरूले धेरै शुल्क लिने र पुराना कम्पनीसँग काम गर्ने भएकाले बिमांकी पाउन कठिन भएको समितिको भनाइ छ ।  

कम्पनीहरूले बिमांकी नियुक्त गर्न बिमा समितिमा निवेदन दिनुपर्छ । बिमा समितिको बिमांकीले कम्पनीले सिफारिस गरेको बिमांकीलाई प्रमाणित गरेपछि मात्रै समितिले कम्पनीलाई बिमांकी नियुक्त गर्ने स्वीकृति दिन्छ । बिमांकी नै नियुक्त गर्दा लामो प्रक्रिया लाग्ने भएकाले समितिले रोस्टर निर्माण गरेको हो । तर, रोस्टरमा सूचीकृत भएका बिमांकीलाई बिमा समितिको प्रमाणित गर्नुपर्छ वा पर्दैन भन्ने विषयमा भने निर्णय नभएको समितिले बताएको छ । 

बिमांकीय मूल्यांकनलाई ८ लाखसम्म 
नेपाली जीवन बिमा कम्पनीहरूले बिमांकीय मूल्यांकनका लागि ८ लाख रुपैयाँसम्म भुक्तानी गर्ने गरेका छन् । कम्पनीहरूका अनुसार बिमालेख निर्माण गरेबापत कम्पनीलाई औसत १ लाख ५० हजार रुपैयाँसम्म भुक्तानी गर्नुपर्छ । नेपालका सबै कम्पनीहरूले भारतीय बिमांकीसँग काम गर्दै आएका छन् भने मेटलाइफ इन्स्योरेन्सले ताइवानको बिमांकीसँग काम गर्दै आएको छ । बिमा समितिले पनि भारतीय बिमाकी सुभ्रमन्यू कोलिमारलाई बिमांकी नियुक्त गरेको छ । नयाँ पत्रिकाबाट


Tags : #Beema Samiti

प्रतिकृया दिनुहोस